Liwat naman nga nagahatag sang risgo sa mga pananom sa mga Barangay nga yara sa sulod sang 4km Permanent Danger Zone ang pagbuga sang maitom nga aso sang Bulkan Kanlaon nga may kaupod nga abo.
Sa interview sang Bombo Radyo Bacolod kay Punong Barangay Joselito Martinez Jr. sang Barangay Biak-na-bato, La Castellana, sila ang naanad na nga magbugtaw nga naga-aso ang bulkan.
Suno diri, mapanimahuan na ang baho sang asupre kag makit-an naman ang magamay nga ashfall nga nagadikit sa mga dahon sang pananom kag sa salakyan.
Gani panugyan sini sa mga pumuluyo nga magsuksok sang facemask.
Kalakip sa ginakahangaw-an ang mga pananom partikular na sa sulod sang 4km Permanent Danger Zone kaangay sang petchay, carrots kag iban pa nga nagakalayong bangod sa ashfall.
Aminado ini nga manipis lamang ang ashfall sa ila, kag mas madamol ang ashfall nga narecord sa Barangay Pula, Canlaon City, Negros Oriental.
Paathag ni Martinez nga may 47 ka indibidwal nga nagapuyo mismo sa sulod sang 4km PDZ ang na-evacuate na apang ang apektado ang nagadangat sa masobra 500 bangod madamo ang nagapanguma sa sulod sang 4km PDZ apang yara sa gwa ang balay kag may-ara lamang sang hayob-hayob.
Sa karun ginapahanugutan paman nga makasulod sa area ang mga nagapanguma apang sila ang indi pwede nga magtinir ukon magtulog sa lugar.
Ginamonitor man nila ang water supply, kag ang mga ini ang ginapadal-an man sang drinking water sang banwa sang La Castellana kag Negros Occidental Provincial Government.
Ginapasalamat man ni Martinez nga nakapatigayon sang payout sa 235 ka benepisyaryo sang Tulong Panghanapbuhay sa Ating Disadvantaged/Displaced Workers (TUPAD) program sang Department of Labor and Employment (DOLE) kahapon.
