Una nga ginsecure sang isa ka pamilya ang mga pananom antes paman magtupa ang abo kasunod sang paglupok sang Bulkan Kanlaon kagab-i.
Suno kay Joenito Hilarde, residente sang Prk Kalubihan 1, Brgy Mailum, Bago City, sang nakaligad nga Disyembre 9, 2024, madamo sila sang mga tanom kag bulak nga nagkalamatay matapos matup-an sang mainit nga abo kag magagmay nga mga bato halin sa bulkan.
Gani kagab-i matapos mabatian ang lupok, gilayon nga ginpahimos sang iya asawa ang ila mga tanom nga panakot kaangay sang katumbal kag sibuyas, agud indi matup-an sang abo.
Suno diri, matapos ang pagsigabong apat tubtob lima ka minutos pa antes nagtupa ang abo gani sila ang may tion pa agud makapanghimos.
Samtang aminado man si Hilarde nga may mga bahin pa sang ila atup nga nadunot bangod sa ashfall sang nakaligad nga paglupok sang bulkan.
Iban diri ang na-islan na niya paagi sa pagbaligya sang iya nga karbaw.
Suno diri, kun may-ara liwat sang ihatag nga bulig sa ila, tion man ini agud mapang-islan na niya ang busluton nga mga atop.
