Nagpatigayon sang test run ukon dry run ang mga eskwelahan kag barangay nga magacompete sa Masskara Festival 2025 Arena and Street Dance Competition kahapon.
Sa interview sang Bombo Radyo Bacolod kay Bhadz Defensor, chairman sang Arena and Street Dance Competition, all set na ang mga venues kun sa diin ginhatagan nila sang tyansa nga makatest run ang mga participating school para sa school category kahapon sang aga, samtang ang mga barangay participants naman sa hapon.
Ini agud maseguro ang smooth transition sa adlaw na mismo sang kompetisyon.
Indi kaangay sang tinalikdan, unahon ang Arena Competition sa Paglaum Sports Complex.
Ginaplano nila nga pagtapos na sang ikalima nga contingent sa Arena Competition suguran ang Street Dance Competition sa tinutuyo nga indi ma-utod kag mangin tayuyon lamang ang programa.
Para sa Arena and Street Dance Competition (School Category) bwas, ang mga props ang ibilin sang mga partisipante sa bahin sang Hernaez Street matapos ang ila pagperform sa Arena Competition.
Ginalantaw sini nga may mga salakyan na nga iplastar sa dalan ang kada eskwelahan agud mahapos nalang ang pagtransport sang mga props.
Pahanumdom man ni Defensor nga maximum nga 100 nga props men lamang ang ginapahanugutan sa school category, samtang 150 props men naman sa barangay category sa Domingo.
Sa Street Dance competition sa dalan Araneta, mga handheld props ukon magagmay nga mga props na lamang ang pahanugutan.
Ang mga handheld props ang ibilin man sang mga performers sa dalan sa atubang sang replika sang City Government padulong sa Halandumon tower.
Ini bangod mga dancers na lamang ang pahanugutan nga makasulod sa Bacolod City Public Plaza para sa Community Dance and pagsinadya kadungan sa Announcement of Winners.
