Dagsa na karon ang mga pasahero sa puerto sang Bacolod kag iban nga bahin sang Western Visayas agud nga makabalik ang mga ini sa trabaho kasunod sang Semana Santa.
Sa interview sang Bombo Radyo kay PCG District Western Visayas Spokesperson Commander Jansen Benjamin, sa latest nga datos sang PCG nagdangat sa 1,029,492 ang numero sang outbound passengers samtang 750,305 naman ang inbound passengers sa bilog nga Region 6.
Suno diri, ang may pinakamadamo nga pasahero amo ang nasakupan sang Coast Guard Station sa Aklan nga gateway sang probinsya padulong sa Luzon.
Madamo naman sang mga domestic tourist nga nagpadulong sa Boracay, apang may pagkaistrikto ang isla sang Boracay nga dapat may yara sang booking sa hotel antes makapadulong didto.
Suno kay Benjamin, ginahugtan man ang pagbyahe sa Boracay nga limitado lamang ang maakomodar sang isla.
Mahimo naman nga makabawi na sa negosyo ang mga negosyante bangod sa pagdagsa sang mga turista.
Full alert naman ang PCG sa karun nga adlaw tubtob alas-10:00 sang gab-i sa ginalauman nga magdamo pa gid ang mga pasahero.
Indi lamang ang pagdagsa sang pasahero ang ginalauman sang PCG Western Visayas, kasubong man ang pagsulod sang dako nga mga trucks.
Gani ila ginalauman nga maakomodar ang tanan apisar sa pagginutok.
