Natalupangdan nga mas nagdiutay man ang nagtransact sa Kapitolyo subong nga Miyerkules Santo bangud half day lang ang trabaho, santo sa mandu ni President Bongbong Marcos.
Suno kay Marcelino Ybanes, isa ka empleyado sa Capitol, normal ang iya nga trabaho apang nagdiutay ang transactions, samtang padayon man ang vital services.
Magabalik naman ang trabaho sa Martes apang may convention ang mga miyembro sang unyon sa Lunes sa SMX Convention Center kun sa diin magatambong man si Governor Eugenio Jose ‘Bong’ Lacson.
Suno kay Ybanes, sa balay lang ini magapamalandong bangud sa kainit sang panahon.
Samtang…. ginalauman ang pagdugok sang mga pasahero kadungan sang half day nga trabaho subong nga adlaw para sa long holiday sang mga empleyado para sa Semana Santa.
Sa BREDCO Port, may yara sang 398 ka outbound nga mga pasahero padulong sa Dumangas, Iloilo kag 161 inbound passengers naman pasulod sa Negros sa byahe sang tatlo ka fast craft kag tatlo man ka roro kaina sang aga.
May yara sang limitasyon sa byahe bwas tubtob sa Biyernes, gani ginalauman ang pagdagsa sang pasahero subong nga adlaw.
Samtang, ang byahe sa CERES South terminal ang indi pa man tuman kagutok.
