Nagdagsa na ang mga pasahero sa mga pantalan humalin kahapon, pila ka adlaw antes ang UNDAS 2026.
Sa interview sang Bombo Radyo Bacolod kay Lieutenant Junior Grade Richelito Arbis, Assistant Station Commander sang Coast Guard Station Northern Negros Occidental, kahapon masobra 4,000 ang ila narecord nga outbound passengers, kag masobra 4,000 man ang inbound passengers.
Suno diri, ginalauman na nila ang pagdagsa sang mga byahero subong nga Biyernes tubtob bwas Oktubre 31.
Wala naman sila nakabatun sang request sang dugang nga trips gikan sa mga RoRo kag Fast Craft operators.
Samtang wala man sila nakabatun sang request sa pag-untat sang byahe sa Nobyembre 1 tubtob 2 apisar sa ginalauman nga pagnubo sang pasahero.
May-ara man sang Help Desk nga nahamtang sa mga seaports kaupod sa City Disaster Risk Reduction and Management Office sa BREDCO kag Banago Port.
Samtang may-ara man sang mga nagahatag sang libre nga tubig para sa mga pasahero.
Sa pihak nga bahin, aminado si Arbis nga indi tanan nga nagapauli ang para sa pagselebrar sang UNDAS.
Suno diri, may iban nga ginagamit ang kahigayunan nga may long-weekend para sa mga outdoor activities kag bonding, gani magadeploy man sila sang Coast Guard personnel sa mga public beach resort nga natumod nga masami ginapadulungan sa kaangay nga okasyon. Samtang,
ginpasalig sang Vallacar Transit Incorporated nga padayun ang regular nga byahe sang mga Ceres buses sa tigkalalag.
Sa interview sang Bombo Radyo Bacolod kay Jade Maquez, Media and Legal Affairs Manager sang Vallacar, subong nga adlaw tubtob bwas ang ginalauman nila nga pagdagsa sang mga byahero.
Ini bangod antes ang long-holiday, iban ang nagadesisyon nga Biyernes pa lamang magabyahe agud nga mas makapreparar sa pagdu-aw sa mga minatay, kag sa iban pa nga mga plano nga aktibidad.
Samtang sa masami, naga-iwat naman ang byahero kun Nobyembre 1 kag 2, apang pasalig nila nga magapadayun ang byahe.
Karun nga dagsa pa ang pasahero, indi na magahulat ang Ceres buses sang 10 tubtob 15 minutes antes maggwa sa terminal, sa baylo automatic na ang mga ini nga maggwa kun puno na ang unit.
Ini agud macater nila ang influx sang pasahero, makapauli gilayon kag indi maatrasar sa mga preparasyon sa tigkalalag.
