Indi na magpasaka sang kaso ang mga pasahero batok sa driver sang Bacolod City bus nga natumba sa banwa sang Salvador, Benedicto sang Hunyo 14 kun sa diin ang isa ka manunudlo ang ginbawian sang kabuhi.
Sa interview sang Bombo Radyo Bacolod kay sa Police Captain Ignacio Javier, Deputy Chief of Police sang Don Salvador Benedicto Municipal Police Station, ang mga pasahero ang indi na magpasaka sang kaso batok sa driver bangud nakahangop man ang mga ini nga wala ginahungod sang driver.
Apang suno kay Ignacio kun may yara sang pasahero ukon pamilya man nga luyag nga magpasaka sang kaso batok sa driver, bukas ang ila opisina agud nga mag-assists.
Naka gwa naman sa presinto ang driver sang City bus.
Madumduman nga ang bus ang ginhulam sang mga manunudlo sang Paglaum Village Elementary School para kuntani sa pagpatigayon sang team building sa Sipaway Island.
Bangod sa aksidente, nadulaan sang kabuhi ang Grade 3 teacher nga si Arlyn Tolosa Verde samtang pilason naman ang 35 ka iban pa.
Sa karun tatlo na lamang ang nabilin sa ospital bangod sa mga nabali nga tul-an.
Nahibaluan nga sarang lamang makarequest ang mga buluthuan sang bus sa city government kun may ara sang mga aktibidad nga padulongan.
Ang bus sa karun ang gindala sa Vallacar Transit Incorporated agud nga makay-o bangud ini ang gikan sa nasambit nga bus company.
