Nagreklamo ang outgoing president sang Drugstores Association of the Philippines matapos nga mastranded sila sa Bacolod-Silay airport bangud may yara sang technical problem ang eroplano nga pagasakyan nila kuntani kahapon alas 6:00 sang aga nga flight sang Cebu Pacific.
Sa exclusive interview sang Bombo Radyo kay Juvelyn Blancaflor, ginpahulat ang mga ini bangud may yara sang recovery plane nga magaabot apang alas 12:30 sang udto, gin-abisuhan sila nga wala sang magaabot nga recovery plane.
Wala man sang nag-atubang sa ila nga personnel sang Civil Aviation Authority of the Philippines (CAAP) kag sang nasambit nga airline.
Suno kay Blancaflor, wala gid sila gin-abisuhan sang temprano pa nga wala sang recovery plane nga maabot kuntani nakarebook na sila sang temprano pa.
Suno diri, wala na gani sila gin-atubang agud estoryahon angot sa ila sitwasyon, ginpadal-an pa sila sang mga police.
Ginpahayag sini nga kinahanglan nila nga makaabot sa Baguio kagab-i bangud madamo pa sila sang obligasyon nga ubrahon para sa patigayunon nga convention sang Drugstores Association of the Philippines.
OK lang man kuntani sa ila nga magbulag ang flight nga ila nga sakyan kag bisan ano lang nga airline basta makaabot lamang sila kagab-i sa ila padulungan.
Nagakahangawa man ini bangud first time sang pamilya sini nga makatravel.
Ginpahayag man sini nga makaluluoy na ang sitwasyon sa airport kag wala man nagahimo sang tikang ang nasambit nga airline agud nga mahatagan sila sang slot.
Indi naman sila makahulat nga makay-o ang eroplano nga ila kuntani sakyan bangud kaupod sini sa pagbiyahe ang mga opisyales sang Drugstores Association of the Philippines kag madamo pa sila sang asikasuhon pag-abot sa Baguio City para sa ila nga convention.
Kagab-i, ginpasakay na sanday Blancaflor apang liwat naman nga ginpapanaog sa eroplano.
