Pito ka adlaw nga magasarado ang mga patyo sini nga piesta minatay sa ciudad sang Bacolod sumugod sa Oktubre 29 tubtob Nobyembre 4 santo sa Executive Order 61 sang City Government.
Suno kay Executive Assistant to the Mayor Ernie Pineda, nga amo man ang anay pinuno sang Task Force Tigkalalag sang mga tinalikdan nga tuig, ang pagsarado sang mga sementeryo ang kasunod sa guidelines sang National Inter-Agency Task Force.
Bangud sini, temprano nga nagakadto ang mga pumuluyo sa patyo agud magbisita sa ila mga minata rason kun ngaa nagadamo sa karun ang nagabakal sang mga bulak.
Suno kay Pineda, naga-ayo sa iya ang mga flower vendors kun pwede na ang mga ini makabyahe sang bulak nagikan sa Cebu.
Nahibaluan nga sa kaangay nga mga petsa masami nagapadulong sa Cebu ang mga vendors agud nga magbakal sang supply nga magamit sa tion sang tigkalalag.
Samtang ginkalipay naman sang mga manugbaligya ang gulpyada nga pagsaka sang bumalakal apisar nga wala pa ang mga ini ginpahanugutan nga magbaligya sa palibot sang public plaza kag public market.
Ginakalipay naman ni Pineda nga positibo gihapon ang pagtan-aw sang mga flower vendors apisar sang ginapangatubang nga krisis kag nagapangita sang paagi kaangay sa pagbaligya sang mga bakal sa amo nga tinion.
Pila sa mga flower vendors ang sa karun nagahanda na sa pagbaligya nalang sang mga kalan-on nga masami ginaluto kag mga prutas sa tion sang tigkalalag bangod nakita sang mga ini nga sa amo nga butang mas makaganar.
Suno sa executive assistant, bangod sa pagsarado sang mga sementeryo, ginalauman nga sa panimalay nalang hiwaton sang mga Bacolodnon ang all souls day kag all saints day.
