Ginpakakas na sang Punong barangay sang barangay Cabug, Bacolod City ang mga permanent structures sa Bacolod-Negros Occidental Economic Highway (BANOCEH) kasunod sa pagpadala sang sulat sang Department of Public Works and Highways (DPWH).
Suno kay Punong barangay Jennifer Pintucan, duha ka beses na nga nagpadala sang sulat ang DPWH sa ila barangay nga pahalion ang mga permanent structures.
Nagaperma man ang mga vendors kag nagpasalig nga mahalin sa area apang wala nila ginatuman.
Gin-athag sini nga mahimo sila makabaligya sa area basta alas- 5:30 sang hapon tubtob alas- 9:00 sang gab-i lamang kag dapat nga movable ang ila mga balaligyaan.
Apang, sa paglibot sang DPWH natukiban nga pito tubtob siyam ang permanent structures.
Pahanumdom sini nga mas maayo nga sila nga mga vendors ang mahimos sang ila balaligyaan agud mapuslan pa nila ang ila mga materyales kag indi na paghulaton pa ang barangay ukon ang DPWH nga magpahalin sa ila.
