Ginpasalig sang tagpamaba sang Inter-Agency Task Force sang syudad ang Bacolod nga hugot nga ginamonitor ang mga persona nga nakapalapit sa COVID patient no. 19.
Sa interview sang Bombo Radyo Bacolod kay Dr. Grace Tan, ginpahayag sini nga natapos na ang contact racing sa mga nakaupod ni Bacolod Patient No. 19 matapos magpositibo ang resulta sini sa RT-PCR test.
Ginkordon naman ang balay sini kag ang balay sang trisikad driver nga ginsakyan sini sang gindul-ong ini sang city bus sa bangga padulong sa ila puluy-an.
Suno kay Tan, ginpahayag sang pasyente nga nag-inom ini upod ang iya mga abyan.
Ginaclose monitoring sa karun sang City Health Office (CHO) ang 16 ka mga nakaupod kag napalapitan sini kag ginahulat kun ang mga ini ang magadevelop sang sintomas.
Nagapabilin naman nga asymptomatic ang pasyente.
Hugot naman nga ginbinlan sang mga opisyales kag sang City Health Office nga magpabilin nga nakahome quarantine samtang nga nagahulat sang resulta sang ila RT-PCR test.
Ginkompirmar man ni Tan nga santo sa pagtuon sang World Health Organization (WHO), indi mataas ang risgo sang asymptomatic nga pasyente sa pagpanglaton apang indi dapat maghatag kompyansa ang publiko.
Nagpanugyan man ini sa tanan nga dapat intiendihon kun ano ka delikado ang coronavirus kag paanu ini maglaton agud mangin aware kag mabuhinan ang kahigayunan nga malatnan sang masakit bangud dako ang posibilidad nga malatnan kun kulang ang ihibalo angot sa ginapangatubang nga health crisis.
Sa karun, ginahulat pa ang resulta sang RT-PCR test sang iban nga LSI bangud siyam pa lamang ang nag-abot nga resulta sa Bacolod.
Sa tion nga makabati sang mga balita dapat siguruhon nga validated ang impormasyon.
