Gindeploy na kahapon nga adlaw ang mga personnel sang Bureau of Fire Protection nga magabantay sa mga eskwelahan nga pagagamiton bilang polling centers sa Lunes, Mayo 9.
Suno kay Fire Chief Inspector Rodel Legaspi, fire marshal sang Bacolod City Fire Station, yara sa red alert status ang BFP kun sa diin tubtub sa Mayo 11 pa ang deployment sang mga personnel.
Suno kay Legaspi, 65 porsyento sang workforce sang Bacolod City Fire Station ukon masobra 70 ang gin-utilize para sa deployment angot sa eleksyon.
Ang mga personnel naman sang pito ka substations sa ciudad ang gindeploy sa mga eskwelahan nga ila nasakupan kun sa diin may firetruck nga nakastandby sa mga polling places.
May yara man sang quick response team nga ginalakipan sang crew, arson investigator kag fire safety inspector nga magabulig sa paglantaw kag pagsecure sang lugar agud masiguro nga luwas ang eleksyon.
Nagacoordinate naman ang BFP sa iban nga ahensya sang gobyerno nga nagabantay sa seguridad sa piniliay.
Ang fire safety inspection ang ginpatigayon naman tinalikdan nga bulan kun sa diin ginhatagan sang kopya sang findings ang Commission on Elections agud ila mahibaluan kun ano ang rekomendasyon sang BFP angot sa fire safety measures.
Ginhatagan naman sang solusyon ang mga deficiencies nga nakita sang BFP.
Ginpasiguro naman ni Legaspi nga nakaalerto ang BFP personnel sa pagbantay sa adlaw sang eleksyon. Samtang,nakaplastar naman ang mga quick response team sang Bureau of Fire Protection sa bilog nga probinsya sang Negros Occidental agud nga magbulig sa safety sang eleksyon sa Lunes.
Suno kay Fire Supt. Kim Celisio, acting provincial director sang BFP Negros Occidental, sang Biyernes nagsugod ang deployment sa probinsya kag yara sa red alert status ang BFP.
Nakastandby naman ang special rescue force agud makaresponde gilayon kun may untoward incident.
Suno kay Celisio, indi tanan nga polling centers ang may firetruck bangud 65 lang ang kabug-usan nga firetruck sang BFP sa bilog nga probinsya.
Bangud sini, gincover nalang strategically ang mga polling places agud nga makaresponde sa kun diin man sila kinahanglanon.
Nagacoordinate man ang BFP personnel sa mga pulis agud makahatag sang impormasyon kun kinahanglan respondehan.
Suno kay Celisio, wala ginbuhinan ang BFP personnel sa Negros Occidental kundi gindeploy sila kun sa diin nga banwa ukon ciudad sila naassign.
Magluwas sang yara sa field, may nagaduty man sa fire station.
Nakadepende naman sa fire marshal kun paano makabulos-bulos sang duty ang wala nag-avail sang local absentee voting.
Nagpahanumdom naman si Celisio sa mga personnel nga ubrahon sang husto ang trabaho agud masiguro nga safe ang komunidad sa sunog.
