Padayon nga nagapatigayon sang training ang Corazon Locsin Montelibano Memorial Regional Hospital sa mga personnel sang ospital para masiguro nga malayo ini sa posibilidad nga matapikan sang coronavirus disease.
Suno kay Dr. Julius Drilon, medical center chief sang Corazon Locsin Montelibano Memorial Regional Hospital, ginahalungan nila nga wala sang may mangin casualty sa bahin sang mga personnel sa ospital.
Ini bangod wala na sang magabulong sa mga pasyente sa oras nga malatnan sang virus ang mga medical personnel sang ospital.
Sa CLMMRH, may yara nalang sang nabilin nga tatlo ka mga Persons Under Investigation (PUI).
Ang isa diri ginrefer halin sa ospital sa gwa sang siyudad nga kulang sa pasilidad para maakomodar ang amo nga pasyente.
Ang duha naman nga PUI ang gin-admit kagab-i kag may yara ini sang pneumonia.
Halin sang Pebrero 5, may yara na sang 16 tubtub 18 ka PUI nga nadischarge na kag tanan sila ang nangin negatibo sa COVID-19.
Sa mga magapositibo matapos nga matest positive, liwat ini nga pagakuhaan sang test para mahibaluan kun positibo pa ukon nagtahaw na ang virus, kag sa ikatatlo nga test kun liwat nga maganegative, posible na nga iga-release ini halin sa pagkaquarantine.
Suno pa kay Drilon, ginatrato nila nga positibo ang tanan nga mga PUI ilabi na ang mga may yara sang masakit nga pneumonia.
Gina-ekspektar sang CLMMRH nga mapabilin nga zero ang kaso sang COVID-19 sa ospital.
Suno diri, wala sila nagalantaw kun makagastos sang milyones kun ini ang para sa ikaluwas sang kabuhi.
Ginakampanya ni Drilon nga magsugid sang matuod ang mga pumuluyo kun may ara sang travel history sa mga lugar nga may kaso sang COVID-19 kag indi na ini pag-ipanginwala.
Suno pa diri, sa padayon pa nga pagtest sang mas madamo, mas magadamo man ang magapositibo.
Bangod sa pagpatindog sang western visayas RITM, maseguro na nga magadasig ang proseso sang pagkuha sang resulta sa test.
