May yara na sang mga alias ang mga persons of interest sa kaso sa pagpatay kay Freya Mae Go.
Madumduman nga nasapwan ang bangkay sang 17 anyos sa kahilamunan sa Barangay 12, Bacolod City nga nakabaklid, may gapos ang kamot kag wala na sang pang-idalom nga panapton.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, alias pa lamang sang mga persons of interest ang may yara sila samtang ginaverify pa ang matood nga pangalan sang mga ini.
Mahibaluan nga masobra duha ka tawo ang ginalantaw nga suspek sa pagpatay kay Go.
Suno kay Depasucat, may ginasundan na sila nga mga persons of interest apang nagakinahanglan pa sila sang dugang pa nga ebidensya kag sa karun nagapangita pa gid sila sang witness sa kaso.
Pahayag sini, nareview na nila ang pila ka mga CCTV footages nga may yara sila lakip na diri ang footage malapit sa boarding house ni Go.
Gin-athag sang Deputy City Director for Operations sang Bacolod City Police Office nga Special Investigation Team kag indi Special Investigation Task Group ang ginhuman para sa imbestigasyon sa kaso ni Freya Mae Go.
Madumduman nga si Go ang nasapwan nga bangkay na sang October 22 nga wala na sang pang-idalum nga panapton kag nakabaklid ang mga kamot sa Barangay 12, Bacolod City.
Suno kay Police Lt Col Lester Leada, Deputy City Director sang Bacolod City Police Office, standard operating procedure sa mga kapulisan nga sa tion nga may sensational cases dapat magtukod sang special investigation agud nga magtutok sa imbestigasyon sa kaso.
Suno kay Leada, Special Investigation Team ang gindihon bangud ang indi man Police Regional Office ang nagauyat sa imbestigasyon sang kaso.
Suno diri, ang nagapanguna sa gihapon sa imbestigasyon ang station commander sang police station bangud sila ang nagapatigayon sang interview sa possible nga witnesses samtang sila naman nga SIT nga gikan sa BCPO ang naga-inventory kun ano pa ang kulang nga ebidensya agud mapasaka ang kaso.
Si Leada ang gindesignar ni BCPO Director Police Col Joeresty Coronica nga magpanguna sa Special Investigation Task Team.
