Nagapati ang legal counsel sang mga petitioners nga nagapamatok sa pagsaylo sang voter’s registration ni anay Congressman Albee Benitez nga iya mga supporters ang rason sang nagasaka nga numero sang flying voters nagikan sa gwa sang Bacolod.
Suno kay Atty. Marcus Vaflor, bangud sa deklarasyon ni Benitez nga magapadalagan ini bilang alkalde sa 2022 Elections, mas nagbakod ang iya pagpati nga ang indi normal nga pagsaka sang numero sang mga aplikante nagikan sa iban nga local government units nga luyag magparehistro sa ciudad.
Ginaalegar sini nga may yara ang anay kongresista sang koneksyon sa numero sang aplikante nga luyag man magsaylo sang voter’s registration sa Bacolod.
Suno diri, may yara pa sila sang imbestigahan nga ikalima kag final batch sang mga applicants nagikan sa iban nga mga ciudad kag munisipalidad.
Nagapati man ang kampo sang mga oppositors nga mabakod ang ila ebidensya santo sa ERB hearing kahapon.
Suno kay Atty. Jessie Lanete, naplastar na nila kahapon ang ila bahin sang ERB hearing sa Comelec Bacolod.
Indi man ini sigurado kun san-o magpagwa sang desisyon ang COMELEC bangud madamo pa man sang applicants nga ila ginaatipan.
Apang ginalauman nga antes matapos ang Hulyo, makapagwa na sang desisyon paagi sa resolusyon ang ahensya.
Ginakabig naman sang isa ka oppositor nga insulto sa Barangay Mandalagan kag Bacolod City ang pagsaylo sang voter’s registration ni Benitez kag pagpadalagan sini bilang alkalde.
Suno kay Jona Abao, 45 ka tuig na nga residente sang Abcasa, Barangay Mandalagan, nakahibalo ang mga residente ilabi na sa Mountain View Subdivision nga wala didto nagapadulong ang anay kongresista.
Suno sa iya, luyag nila ang transparent kag patas nga eleksyon ilabi na sa ila barangay gani indi dapat nga pahanugutan ang maskin sin-o lang nga magparehistro nga wala man nagapuyo sa lugar.
