SRI LANKA – Nagahanda na ang mga Pilipina nga nakapamana sang Sri Lankan locals nga magpauli diri sa Pilipinas bangud sa nagapadayon nga economic crisis nga nagresulta sa lapnagon nga hublag protesta ilabi na sa capital nga Colombo.
Suno kay Bombo correspondent Christina Sorongon, ginlibre na sang gobyerno ang travel documents nga nagabalor sang 12,000 Rupees.
Suno kay Sorongon, mapauli nalang ini sa Pilipinas bangud kabudlay na sang sitwasyon kag ginalauman nga magalala sa masunod nga inadlaw.
Sa Lunes, magapadulong ini sa opisina nga nagaproseso sang repatriation agud nga makaupod ini sa mga repatriates, kaupod ang duha niya ka bata.
Indi naman makaupod ang iya bana bangud wala ini sang tourist visa kag show money.
Suno kay Sorongon, indi niya mapabay-an ang iya kabataan ilabi na nga may bata ini nga gamay pa.
Ang iban nga mga Pilipino ang nag-agwanta sang dako nga gasto sa pagproseso sang mga papeles agud nga makapauli.
Isa sa problema sa Sri Lanka subong amo ang kakulang sang bulong kag medical needs sa mga ospital.
Suno diri, indi malikawan ang emergency gani tuman ka delikado bangud wala na sang bulong.
Nagpanawagan ini kay Presidente Ferdinand ‘Bongbong’ Marcos Jr. kag sa natungdan nga mga ahensya sang gobyerno nga pahapuson kag padalion ang repatriation bangud wala na sila sang kwarta kag wala man sang trabaho ang ila bana nga local sa Sri Lanka.
Nagalaom man ang mga ini nga may bulig ang gobyerno sa mga repatriates pag-abot sa Pilipinas bangud wala sila sang kwarta nga dala.
