Nagpadulong ang mga Pilipino gikan sa nagkalain-lain nga bahin sang kalibutan sa The Hague, Netherlands agud nga magpabutyag sang suporta kay Former President Rodrigo Duterte.
Kagab-i ginpatigayon ang pre-trial sa kaso nga crimes against humanity sa anay presidente.
Sa interview sang Bombo Radyo Bacolod kay Bombo International News Correspondent Michael King, direkta sa Netherlands, pila ka oras antes ang pre-trial nagpadulong na ang mga Filipino sa kilid sang International Criminal Court sa The Hague, Netherlands agud nga magbantay kag magpakita sang suporta sa anay presidente.
Pila sa mga Pilipino ang nagikan sa Qatar, Spain, kag Berlin, Germany kasubong man ang Italy ang nagpadulong sa Netherlands agud ipakita ang ila nga suporta sa kay Former President Rodrigo Duterte.
Wala man sang nagsugo sa mga ini kundi boluntaryo nga nagpadulong sa The Netherlands agud nga ipakita ang ila nga suporta sa anay presidente.
Suno kay Cathy Castro, Filipino nga nagatrabaho sa Qatar nga nagpadulong sa The Netherlands, ginmessage sini ang iya amo nga magaleave ini sa adlaw sang Biyernes agud nga makapadulong sa ICC kag makapabutyag sang suporta sa anay presidente.
Suno diri, sang una nagahatag ini sang suporta sa hipos lamang apang bangud sa iya abyan nga si Diana nangin vocal naman ini.
Suno kay Cathy, halos 89 porsyento nga mga Filipino sa Middle East ang nagasuporta sa anay nga presidente.
Samtang suno naman kay Diana, nagpabutyag ini sang iya supporta sa kay Former President Rodrigo Duterte bangud ini lamang ang presidente nga nag-ulikid sa mga Overseas Filipino Workers.
Suno diri, sadto wala man ini sang labot apang sang ang anay presidente na ang nagpungko agud magpamuno sa pungsod ini na ang ila ginsuportahan bangud sa importansya nga ginhatag sini sa ila nga mga OFWs.
Suno kay Diana, wala man ini nag organize sang pagtipon-tipon sa Qatar bangud ginadumilian ini sa nasambit nga pungsod.
Panugyan sini sa mga Pilipino nga padayon nga palanggaon ang pungsod bangud wala naman sang iban nga magahimo sini kundi kita.
