Nagakahangawa kag nagabantay sa karun ang mga overseas Filipino workers sa Lebanon matapos gin-anunsyar sang Hamas nga napatay sa isa ka airstrike ang isa ka senior official nga nagatinir sa sur nga bahin snag Beirut, Lebanon.
Suno sa grupo, ang Deputy Head of the Political Bureau sang Hamas, ang ila gintawag nga martyr leader nga si Saleh Al Arouri, ang ginpatay paagi sa isa ka Zionist airstrike sa Beirut.
Si Al Arouri ang ginakonsiderar nga isa sa mga founding members sang military wing sang grupo, ang Izz ad-Din al-Qassam Brigades nga nabase sa Beirut.
Gindemolish sang Israeli army ang balay ni Al Arouri sa banwa sang Aroura sa West Bank sang Oktubre.
Suno kay Bombo International Correspondent Norie Salutes direkta sa Beirut, Lebanon, matapos ang balita, wala man nagapanic ang mga residente apang sila ang nagapabilin nga alerto.
Sa karun, suno kay Salutes, wala pa nakapagwa sang statement ang gobyerno sang Lebanon kun ano ang ila pagahimuon nga tikang apang ginkondenar ni Lebanese Prime Minister Najib Mikati kasubong man sang Iran ang natabo nga airstrike.
Suno kay OFW, sa initial nga impormasyon, may anum ka iban pa nga casualties sa nagluntad nga airstrike kag padayon ini nga nagapakig-angot sa iya mga abyan nga Pinoy nga nagatinir sa nasambit nga area.
Padayon man sila sa karun nga nagapakig-angot sa Philippine Embassy kun may mga anunsyo ang Lebanese government kag kun ano ang ila mangin abiso sa mga Filipino sa pungsod.
Suno diri, sa kapin 29,000 ka mga OFW sa Lebanon, kapin 3,000 lamang ang nagparepatriate gani madamo sila sa gihapon apang in kaso nga maglala ang tensyon, nakastandby ang embahada agud magrepatriate sa mga luyag magpauli.
Wala man sang countdown ukon fireworks sa pagsugata sang Bag-ong Tuig sa Lebanon kag bangud sa kahangawa nga may mag-upod sa linupok gani nagtililipon na lamang ang mga OFW sa pungsod agud magselebrar sini.
