FRANKIVSK, UKRAINE – Pila ka mga pumuluyo sa Ukraine, nagtabok na balik sa Kyiv kag karun nga nagapadayun ang Russian invasion.
Suno kay Bombo International Correspondent Joy Fernandez Tolentino, derekta sa Frankivsk, Ukraine, ginakulbaan sila gihapon bangod bisan may ceacefire nagasigi gihapon ang paglinupok.
Pahayag pa sang OFW nga ginatubuan na ang mga ini sang nerbyos kag haluson indi makatulog.
Natalana naman ang ikatatlo nga peacetalk kag nagalaom ang mga ini nga may-ara na sang makasugtan kag matapos na ang gyera.
Suno diri may pila man ka mga pumuluyo nga nagpadulong na sa ila nga lugar matapos mag-evacuate bangod pila ka mga syudad ang nasakop na sang Russian forces.
Suno kay Tolentino, nakigkita na ini sa pila ka mga Pinoy nga nag-evacuate padulong sa Kyiv kun sa diin kalakip diri ang pila ka lima ka tuig tubtob 10 anyos nga mga kabataan.
Apang ginakahangawa man sini nga bangod sa pagsaylo sang madamo nga mga pumuluyo sa ila, ang Kyiv naman ang sunod nga atakihon.
Nagapati ang mga ini nga target sang Russia nga makuha ang capital nga Kyiv apang indi naman ini pag-ihatag ni Ukrainian President Volodymyr Zelensky bangod ini ang sentro sang Pungsod.
Samtang suno kay Telontino, ang mga babayi nalang sa karun ang sarang nga makagwa gikan sa Ukraine bangod ang mga 17 anyos pasaka nga Ukrainian nga lalaki ang ginarequire nga mangin military reservists.
Ang ginapahanugutan lang nga mga lalaki nga makagwa sa pungsod amo ang mga may dala nga magagmay nga kabataan, gani masami sa lalaki nalang ginapadala ang mga kabataan kag nagasunod nalang makaligad ang pila ka oras ang asawa.
Suno diri, may mga Filipino man nga Ukrainian citizen na matapos makapamana kag makapangasawa sang taga-Ukraine kag mabudlayan nga makagwa sa pungsod ilabi na nga madamo sang mga katigulangan sa pungsod ang indi maghalin sa ila nga puluy-an.
Samtang aminado man si Tolentino nga nagpahibalo na ini sa iya nga amo nga luyag na niya magpuli.
Ini bangod ginanerbyos na ini kag gina-ulikid ang nabilin nga pamilya sa Pilipinas.
Pasalig naman sini sa amo nga magabalik siya pagmagtawhay na ang sitwasyon sa Ukraine.
