Kadungan sang mainit nga tiyempo sa Japan kahapon, nangin mainit man ang sunod-sunod nga kadalag-an sang mga Filipino athletes sa Tokyo 2020 Summer Olympics.
Isa na diri amo ang pag-abanse sang Filipino Pole Vaulter nga si EJ Obiena sa qualifying round kun sa diin siya ang nakasulod nga rank 14.
Ginpakigbahin ni Bombo International Samuria Correspondent Josel Palma nga nalumpat ni Obiena ang height nga 5.75 meters.
Apang antes sini maclear ang ulihi nga height, nakaangkon naman ini sang duha ka fouls.
Paathag ni Palma nga sa Pole Vault, ginahatagan lang sang tatlo ka attempts ang isa ka atleta agud malumpat ang gintalana nga height.
Apang suno sa iya makaduha ka attempt nga na-foul si Obiena sa 5.75m matapos nga maalang-alang ini sa pagkuha sang buylo gani wala sini matukod ang iya nga pole.
Matapos sini nga maclear ang nasambit nga height, naqualify naman ini sa finals kun sa diin mahatagan naman ini sang kahigayunan para sa medal matches.
Ang mga top pole vaulters sa kalibutan ang magacompete para sa medalya sa Martes, Agosto 3 alas-6:20 sang hapon, oras sa Pilipinas.
