Ginkabig nga dako nga problema ang illegal recruitment kag human trafficking sa mga Pilipino sa Carribean nations nga ginhatagan sang pagtamod sang Department of Labor and Employment kag ni Presidente Ferdinand Marcos Jr sang nakigkita ini sa Filipino Community sa Washington DC.
Sa interview sang Bombo Radyo kay Cayman Bayanihan Filipino Community Leader Dion Sese, nangin sentro sang isturyahanay ang nagakatabo nga illegal trafficking sa mga Pilipino nga nagalaum nga mahatagan sang trabaho sa Grand Cayman apang wala sang ginadangtan nga trabaho didto.
Ginpadaluman ni DOLE Usec PY Caunan ang pila ka mga isyu nga gina-agyan sang mga Pilipino nga luyag magtrabaho sa Cayman apang nagakadagdag sa human trafficking kag illegal recruitment.
Suno kay Sese, madamo sang plano kag seryuso ang gobyerno nga mabuligan ang mga Pilipino.
Suno diri, madamo sang Pilipino ang nagagasto sang dako nga kwarta sa pagpati nga may trabaho nga nagahulat sa ila apang, suno kay Sase madamo sang naga-abot sa Caribbean ang gilayon nga ginapapauli bangod nga wala sang illegal nga trabaho.
Kun kaisa nagahatag man sang bulig ang magagmay nga Filipino organization sa mga biktima sang illegal recruitment apang aminado man ini nga indi nila sarang nga mabuligan ang tanan.
Sa karun, nagdangat sa kapin 2,000 ang populasyon sang mga Pilipino sa Caribbean nga nagatrabaho bilang accountant, domestic worker, nurse, construction workers kag hotel staff.
Sa pihak nga bahin, ginpasalamatan ni President Marcos ang mga Overseas Fiipino Workers ang sakripisyo kag trabaho nga ila ginahatag nga nagpasanyog sa ekonomiya sang pungsod.
