BACOLOD CITY — Tuman na ang pagpanghanda sang mga Pinoy sa estado sang Florida para sa ginalauman tuman kabaskog nga Hurricane Irma nga magaigo sa ila sa maabot nga weekend.
Nalakip sa mga Pinoy nga nagahanda para sa evacuation anuman nga oras ang Negrense designer nga si Kirsten Regalado, tumandok sang banwa sang La Castellana, nga nagapuyo na sa Miami, Florida.
Sa exclusive interview sang Bombo Radyo, ginpahayag sini nga ginpaidalom na ang ila lugar sa state of emergency kag naka-standby na ang tanan nga government guard, lakip naman ang kapulisan, agud magresponder pananglitan may magluntad nga emerhensiya may angot sa Hurricane Irma.
Apang suno kay Regalado, masami nga nagapanghanda ang Florida para sa anuman nga kalamidad kag makabig man nga “resilient” ang mga pumuluyo didto.
Sa iya nga bahin, sang nagligad nga semana pa ini nagsugod sa pagpreparar sang mga kinahanglanon, partikular na ang pagkaon, tubig, emergency supplies, kag batteries.
Plano nila nga mag-evacuate Huwebes sang aga, oras sa Amerika, kag didto sila magatiner sa Miami Children’s Hospital sa diin nagatrabaho ang iya nga bana.
Pagsiguro ni Regalado, ang nasambit nga bululngan ang gintukod nga makasarang sa category five hurricane kaangay sang Irma.
