Holiday sa Kuwait sumugod subong nga adlaw tubtob sa Domingo bilang pag-obserba sang mga Muslim sang Eid al-Adha.
Suno kay Bombo International Correspondent Jov Guanco Velasco direkta sa Kuwait, wala sang trabaho kag sirado halos tanan nga opisina sa pungsod tubtob sa Domingo bangud dako nga selebrasyon para sa mga Muslim ang Eid al-Adha.
Suno kay Velasco, subong nga adlaw ang highlight sang selebrasyon kag naga-ihaw sang karnero, baka kag kanding ang mga Muslim kag ila ini ginakaon kaupod ang ila pamilya.
Apisar nga Katoliko ang mga overseas Filipino workers sa pungsod, ila ginasunod ang tradisyon sang ila mga amo nga Muslim kag naga-upod man ang mga ini kun diin sila makaon.
Suno sa iya, nagatipon ang Muslim community, nagapadulong sa mosque kag nagapangamuyo.
Hugot naman ang seguridad sa pungsod gani kampante ang mga residente pati na ang mga Filipino nga wala sang ginamo nga magaluntad sa pagselebrar sang Eid al-Adha.
