SAUDI ARABIA – Para sa selebrasyon sang Eid al-Adha, wala sang trabaho sa mga opisina kasubong man nga wala sang klase sa Saudi Arabia kag trabaho gid lamang sa ospital ang bukas.
Sa interview sang Bombo Radyo kay Bombo International News Correspondent Ferolyn Galeno Posecion, ang Eid al-Adha ukon Feast of Sacrifice nagasunod sa istorya ni Abraham sang ginhangkat sang Allah ang iya pagtuo paagi sa paghalad kag pagpatay sa iya bata nga si Issac, apang sang nakita sang Allah ang hugot sini nga pagtuo, ginbuslan sang Allah ang bata sini sang isa ka sapat nga amo ang karnero kag nasalbar si Isaac.
Suno diri, amo ini ang pagsulundan sang mga Muslim kun sa diin sila nagahalad sang mga sapat kaangay sang kanding, baka, ukon karnero.
Para sa Eid al-Adha, ang mga Muslim nagalibot sang pito ka beses sa Al-Ḥajar al-Aswad ukon Black Stone of Mecca suksok ang proper attire sang Muslim religion.
Matapos sini, sila ang nagapadulong sa duha ka bukid nga Safa kag Marawa kag maglakat sang pabalik-balik sa pito man ka beses.
Ang karun nga adlaw, Miyerkules, Hunyo 28, ang panugod sang highlight sang Feast of Sacrifce tubtob sa Biyernes, Hunyo 30.
Subong nga adlaw, wala sang trabaho kag klase para sa selebrasyon tubtob sa Hulyo 1.
Ang mga Muslim magaselebrar sa ila tagsa ka panimalay kaupod ang mga pamilya, kag sila naga-ihaw sang sapat nga ila man ginapalab-ot sa ila mga kauturan nga pigado.
