UKRAINE – Nag-evacuate na ang mga Pilipino nga nagatrabaho sa Ukraine kadungan sang pagsakop sang Russia sa nasambit nga pungsod.
Suno kay Bombo correspondent Joy Fernandez Tolentino nagikan sa Kyiv, Ukraine, ginsugat ini sang iya employer sa iya accommodation agud nga makapadulong sila sa mas hilway nga lugar.
Ang iban naman nga mga Pilipino nga indi masugat sang ila amo ang nagpadulong sa konsulada sang Pilipinas sa Kyiv.
Suno kay Tolentino, mabatian na nila ang linupok malapit sa airport sang ciudad.
Indi man sunod-sunod ang linupok suno sa OFW apang dalagko ini kag tag-20 ang minutos ang antad.
Nag-abiso man ang ila agency nga mag-evacuate na sa mas madali nga panahon.
Suno sa Pinay, magaupod ini sa iya employers kun sa diin sila makadto.
Ang iban naman nga mga Pilipino ang nagpadulong na sa Lviv nga yara na sa border sang Ukraine kag Poland.
Wala naman nahimutig ni Tolentino nga nakulbaan ini sa sitwasyon bangud ginlusob na sang Russian forces ang pila ka ciudad sa Ukraine.
