Nagalaom ang mga Pilipino sa Estados Unidos nga safe ang mga service men nga ginpadala sa Middle East.
Sa interview sang Bombo Radyo kay Noor Moraña, isa ka OFW sa Houston Texas, USA, ginpahayag sini nga yara sila sa maayo nga kahimtangan apang nagapangamuyo ang mga ini sang kaluwasan sang mga Pinoy nga ginpadala sa Middle East.
Suno kay Moraña, sang adlaw nga gin-assassinate si top Iranian general Qassem Soleimani, madamo nga mga service men ang ginpangdeploy sa Middle East kalakip na diri ang mga Pilipino nga sundalo.
Apang nagapasalamat ini bangud nangin positibo ang ginhambal ni President Donald Trump sa iya nga address to the nation kag wala nadayon ang retaliation.
Suno sa OFW, normal kag business as usual lang gihapon ang ila nga kahimtangan bangud suno sa iya, naanad na sila nga ang ila lugar ang permi gina-atake sang terorista.
Ginatrain man ang mga residente, suno kay Moraña, kun ano ang dapat nga himuon sa mga nagakaangay nga insidente.
Nagpasalamat man ini sa tanan nga nangamuyo para sa ila kaluwasan kag nanghingyo man ini nga pangamuyuan man ang mga suldado nga nadeploy sa Middle East.
