Ginpakigbahin sang mga kilala nga pintor sa ciudad sang Sagay, Negros Occidental ang ila mga eksperyensya kag mga natun-an bilang isa ka artist.
Sa interview sang Bombo Radyo kay Leo Carton, sadto may isa ka artist sa ila lugar nga masami sini malabayan.
Bangod permi ini nagalantaw sa mga paintings nga naexhibit, siya ang ginhatagan sang pinta, brush kag canvas sang pintor.
Humalin sadto nagtu-on na ini kun paano magpinta kag sa karun nangin kilala na.
Suno kay Carton, ang iya art ang masami nagapakita sang sitwasyon sa komunidad, national man ukon international.
Dugang pa sini, paagi sa iya arts siya ang nakaangkon na sang awards kag pagkilala indi lamang sa Pilipinas apang kasubong man sa luwas sang pungsod sang nagpartisipar ini sa Busan International Performing Arts Festival sa South Korea.
Pahayag ni Carton isa ka calling ang mangin artist kag nagapangabay ini nga siya madumduman paagi sa iya art nga may kinalain sa iban.
Samtang, suno naman sa artist nga si Christopher Fernandez, siya ang empleyado sang gobyerno kag basta may yara sang aktibidad sa ciudad sang Sagay ginalakip sini ang mga artist agud mapakilala ang ila talento.
Suno diri, nag-umpisa lang ini bilang lay out artist sa iya eskwelahan sadto kag sa karun mas gipabakod pa gid sini ang iya talento.
Pahayag ni Fernandez, mas maayo nga masulod ang tawo sa arts sangsa sila ang mag-engage sa mga malain nga butang sa kalibutan.
Nangin art gallery naman sini ang mga cafe kg restaurants sa ciudad sang Sagay kun sa diin sini ginadisplay ang iya mga hinimoan.
Sa karun, ginapasa sini sa iya bata ang iya abilidad kag mga natun-an sa arts bangod ini ang isa ka butang nga luyag niya ihatag sa iya bata.
