130 ka mga kapulisan ang ideploy sa pagbantay sa Bacolod City Government Center para sa Grand Salubong sa Masskara Festival 2024 karun sa gab-i.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, magluwas sa 130 ka police personnel, may ma-augment man nga force multiplier, traffic enforcers kag mga katapo sang Bacolod City Disaster Risk Reduction and Management Office.
Ang 130 nga kapulisan ang maga-shifting naman sa pagbantay halin aga tubtob matapos ang programa bwas sa kaagahon.
Magluwas sa ila, may augmentation man gikan sa Negros Occidental Police Provincial Office.
Kalakip sa mga focus nila sa pagbantay ang palibot sang stage, sa market area kag ang carnival site sa likod sang BCGC.
Pahanumdom ni Depasucat sa mga magatambong sa Grand Salubong nga ginadumilian ang paglagaw bitbit ang makahulubog nga ilimnon, panigarilyo kag vape sa matawo nga mga lugar kasubong man ang pagdala sang bladed weapon kag mga armas-luthang sa festival site.
Panawagan sini nga magkooperar sa mga pagsulundan sang kapulisan kag mag-enjoy na lamang agud matapos nga masadya kag malinong ang selebrasyon.
Ang Grand Salubong Caravan ang nag-umpisa alas-4:00 subong nga hapon gikan sa Brgy Singcang Airport kag magadungka sa BCGC kun sa diin may patugayunon nga concert kag fireworks display.
