Gindugangan sang Negros Occidental Police Provincial Office (NOCPPO) ang mga police personnel nga nagahatag sang seguridad sa mga local chief executives sa probinsya.
Sa interview sang Bombo Radyo kay Police Captain Judesses Catalogo, tagpamaba sang NOCPPO, gin-abisuhan ni Police Regional Office 6 (PRO6) Director Police Brigadier General Flynn Dongbo kag Provincial Director Police Colonel Leo Pamittan ang local PNP nga magpatigayon sang dialogue sa mga elected officials tuhoy sa threat assessment ukon kun may nagakabaton ang mga ini nga pagpamahog.
Suno kay Catalogo, ini agud makahibalo ang mga chief of police kun may pagpamahog sa mga local chief executive ilabi na sa mga alkalde kag bise-alkalde kag agud mahibaluan man kun kinahanglan nga dugangan ang ila security detail.
Suno sa iya, mismo si Pamittan ang nagcoordinate kay Negros Occidental Governor Eugenio Jose “Bong” Lacson agud hibaluon kay may pagpamahog ini nga nabaton.
Suno sa gobernador, wala ini sang may nabaton nga pagpamahaog apang gindugangan sa gihapon ang mga police personnel nga naka-assign sa Provincial Capitol ilabi na kun yara didto si Governor Lacson.
Gindugangan man ang mga local police personnel sang mga local chief executives sang tagsa-tagsa ka banwa kag ciudad sa probinsya.
Suno kay Catalogo, nagareport ang mgaa chief of police kay Col. Pamittan agud mahibaluan kun kinahanglan nga dugangan ang mga security personnel sang mga opisyales.
Suno sa tagpamaba sang NOCPPO, wala man sang threat ukon intense nga political rivalry sa probinsya apang nagapabilin sila nga alerto sa paghatag sang seguridad sa mga elected officials.
