Ginmando na sang head sang Operations Management Unit sang Bacolod City Police Office (BCPO) sa tagsa ka mga police stations sa Bacolod City nga padayon nga ipatuman ang curfew sa mga minors.
Madumduman nga tinalikdan nga semana, ang curfew maykaangtanan sa COVID-19 pandemic ang ginpalos na sa syudad sang Bacolod.
Nagtuga naman ini agud nga sa sobra nga pagka-excite sang mga pumuluyo sa amat-amat nga pagbalik sang normal, kalakip bisan ang mga kabataan sa mga nagaliyong bisan sa kagab-ihon kag kaangay nga nalipatan na nga may curfew sa mga minors.
Suno kay P/Lt Col Lester Leada, aminado ang mga ini nga wala na nila nahatagan sang atensyon ang pag-implementar sang pagsulundan para sa mga minors bangod sa madamo nga hilikuton.
Nagpukaw naman sang ila nga atensyon ang nagluntad nga riot sa Bacolod City Government Center (BCGC) nga nagtuga sa pagkadula sang kabuhi sang isa ka 15 anyos nga lalaki.
Kasunod sang insidente, nagpagwa sang derektiba si P/Col Thomas Joseph Martir nga I-adjust ang deployment sang mga kapulisan partikular na ang Mobile Patrols.
Ginbutangan naman sang mga ini sang personnel ang BCGC 24 oras.
Ginpapanaugan man sang derektiba ang Bacolod City Mobile Force Company (BCMFC) kag Police Police Station 4 nga magbulos-bulos sa pagprovide sang police presence sa palibot sang Government Center.
Ang curfew for minors ang hugot naman nga pagabantayan sang Bacolod City Police Station 1 tubtob 10.
Ang curfew for minors ang nagapabilin sa alas-10:00 sang gab-i tubtob alas-4:00 sang kaagahon.
