Ginpasalig sang Negros Occidental Police Provincial Office (NOCPPO) nga estrikto ang mangin pagbantay sang mga kapulisan sa mga border sang probinsya.
Suno kay P/Lt Abegael Donasco, deputy spokesperson sa NOCPPO, nagpagwa na sang Executive Order si Governor Eugenio Jose “Bong” Lacson maykaangtanan sa pagmonitor sang mga kapulisan sa mga borders kaangay sa syudad sang San Carlos, Kabankalan, kasubong man sa banwa sang La Castellana kag Hinobaan.
Indi naman ini bag-o sa ila suno kay Donasco bangod sumugod palang sang pag-umpisa sang pandemic, nagabantay na ang mga ini sa borders.
Paathag sini nga amo gihapon ang pagabuhaton sang mga kapulisan ilabi na nga yara ang pagpanghangkat sang mas makalalatun nga Omicron variant.
Nagahulat naman sila sang Executive Order gikan kag Governor Lacson kun pagahugtan pa ang pagpatuman.
Sa pihak nga bahin, wala paman ang mga kapulisan nakabatun sang instruction may kaangtanan sa “No Vaccination No Labas” Policy.
Paathag ni Donasco nga sa tion nga may instruction na ang mga ini gikan sa gobernador ukon sa Philippine National Police (PNP) Headquarters nga igapanaog sa Regional padulong na sa Provincial Headquarters, gilayon man nga magahulag kag magapatuman ang mga personnel sa NOCPPO.
