Madinalag-on nga nakafile sang Certificate of Candidacy ang Team Asenso kag Team El Cid sa ciudad sang Bacolod kahapon, katapusan nga adlaw sang COC filing period.
Madumduman nga kahapon nagfile sang COC ang Team Asenso sa pagpanguna ni Bacolod City Mayor Alfredo “Albee” Benitez nga magapapili bilang representative sang Bacolod City Lone District kag ni Congressman Greg Gasaya nga magapapili bilang alkalde sang ciudad samtang bise alkalde naman ang pagapapilian ni Councilor Kalaw Puentevella.
Sa Team El Cid naman, si Vice Mayor El Cid Familiaran ang nagfile sang COC agud nga magpadalagan bilang alkalde kag Councilor Atty. Renecito Novero ang nagfile bilang bise alkalde.
Napuno kahapon ang Bacolod City Public Plaza sang mga supporters sang mga political aspirants nga nagfile sang COC sa katapusan sang filing kahapon.
Kahapon, ginpresentar man sang Team Asenso ang ila nga complete slate sa programa nga ginpatigayon sa Bacolod Public Plaza.
Ginpasalamatan ni Bacolod City Lone District Greg Gasataya ang ginhatag nga pagsalig sang Team Asenso nga siya ang ginpili agud nga magpadayon sa nasugudan ni Bacolod City Mayor Alfredo “Albee” Benitez.
Suno kay Gasataya sa isa ka team may mga tion nga kinahanglan magkuha sang iban nga role apang dapat isa lang sagihapon ang objective.
Ang objective sang Team Asenso amo nga himuon ang ciudad sang Bacolod nga Super City.
Suno diri, kabalo ini nga madamo sila sang mahimo as a team para sa pagumwad sang ciudad.
Nagpasalig man ini nga magatrabaho sila as a team kag ang unity amo ang isa sang ila priority.
