Ginpahayag sang political analyst nga luwas sa mga contractor, dapat lagson man ang mga politiko kag opisyales sang Department of Public Works and Highways nga imbulbado sa anomalya sa flood control projects.
Sa interview sang Bombo Radyo Bacolod kay Atty Jomax Ortiz, nakita sini nga kaangay nga sa Discaya family nagfocus ang kaakig sang mga pumuluyo bangod sila ang nakita nga pinaka-swapang.
Ini ang resulta man sa pagpadayaw nila sang pag-angkon sang 28 ka luxury cars nga kwestyonable kun sa diin nagkuha sang kwarta.
Bangod sila ang may pinakadako nga nakita nga kurapsyon, indi man malikawan nga sa ila magakadto ang kaakig sang tawo.
Sa kada proyekto nga may balor P50 million pasaka, ang mga contractor ang sarang mangatubang sang isa ka count sang plunder, gani kun nagadangat sa 100 ang proyekto sila ang sarang man mangatubang sang 100 counts of plunder.
Pahayag sini ang kaangay ka dako nga kaso ang may silot nga reclusion perpetua ukon life sentence.
Sa pihak sini, dapat suno sa abogado nga mapapanabat man ang mga DPWH officials kag politiko nga involved.
Ini bangod common sense na nga ang kurapsyon ang indi mahimo sang contractor lamang, nga wala sang ihibalo ang mga politiko kaangay sang Kongresista, gobernador alkalde kag mga DPWH officials.
Ginapakamaayo ni Ortiz nga may mga aktibo nga nagalagas sa mga kurap sa karun nga administrasyon kaangay nanday Senator Rodante Marcoleta, Senator Ping Lacson, Senator Tito Sotto, kasubong man si Pasig City Mayor Vico Sotto.
Ginalantaw ni Ortiz nga kun tuod-tuoron ang pagpapanabat sa mga imbulbado, mahimo nga masobra sa tunga sa mga kongresista kag alkalde ang madula sa pwesto.
Pahayag sini nga mabudlay maka-imbestigar ang Senado kag House of Representative bangod sila ang ululupod man, magluwas sang pililion nga mga tampad sa serbisyo.
Pahayag ni Ortiz nga antes paman ang bidding, may contractor na nga napili.
Paathag sini nga indi madayun ang bidding process kun isa lamang ang contractor nga naga-bid, apang kun kaangay sa Discaya nga may siyam ka kompanya nga sila ang share-holder, ang iban ang mahimo magtindog nga kontra sa bidding, nga magakahulugan nga ginahampangan na lamang ang bidding process.
