Aminado ang deputy head sa Bacolod Traffic Authority Office (BTAO) nga madamo sang ginapangatubang nga problema sa temprano nga pagbukas sang Bacolod Negros Occidental Economic Highway (BANOCEH).
Sa interview sang Bombo Radyo Bacolod kay Jose Antonio “Jojo” Robello, Lunes tubtob Biyernes, sila ang nagapahamtang sang traffic enforces sa intersection sang BANOCEH halin alas-4:00 sang hapon tubtob alas-6:00 sang gab-i.
Sa iban nga mga oras, ang mga salakyan ang kanya-kanya na lamang nga nagapaumod sa kun sin-o ang una nga magatabok sa intersection.
Suno kay Robello, bisan hamtangan pa nila sang napulo ka traffic enforcers sa area, indi man nila gihapon makontrolar ang mga salawayon nga motorista nga madasig magpadalagan.
Aminado ini nga masami problema sa bag-o nga dalan ang aksidente, kaangay man sadto sang ginbuksan ang Circumferential Road nga madamo sang ginbawian sang kabuhi.
Sila ang masami man nga nagapahanumdom nga maghalong partikular na sa indi pamilyar nga mga routa apang wala man ginapamatian sang madamo.
Suno pa diri, wala pagid natapos ang BANOCEH, kun sa diin may mga balas pa nga wala mahimos sa kilid sang dalan, apang ginbuksan na sang Department of Public Works and Highways (DPWH).
Paathag sini nga ang pinakamasami nagakatabo ang aksidente bangod sa kondisyon sang dalan ukon may kapaltahan sa driver.
Panindugan sini nga kinahanglan gid nga mahamtangan sang traffic light ang lugar kag bangod madulom kag wala sang street light sa area, panawagan sini nga mas maayo nga sa adlaw na lamang maglabay sa BANOCEH.
Pahanumdom ni Robello sa mga motorista nga maghinay lamang sa pagmaneho kag magpanilag gid sa palibot.
Sa pihak nga bahin, ang BTAO ang magarekomendar lamang sa Sangguniang Panlungsod, kag ang konseho ang magadesisyon kun san-o ipatuman ang total banning sang dalagkuan nga mga trucks sa circumferential road kag ireroute sa BANOCEH.
