Ginpatpat sang National President sang Alliance of Concerned Teachers (ACT) Philippines Union ang mga concerns sang mga manunudlo sa Pilipinas.
Sa interview sang Bombo Radyo Bacolod kay Vladimer Quetua, kun basehan ang EDCOM 2 year 1 kag Year 2 report makita nga may yara sang miseducation nga nagakatabo sa Pilipinas indi sa panahon sang pandemya.
Suno kay Quetua, makita man ini sa resulta sang Programme for International Student Assessment (PISA) kun sa diin siyam sa napulo ka estudyante ang mahina magbasa kag magsulat kun sa diin sa pagkamatuod ang Pilipinas ang pinakamasubo nga mga estudyante sa bug-os nga kalibutan bangud sa sitwasyon sa karun sa education system.
Suno diri, ang budget sa Department of Education ang manubo baliskad sa ginapahayag nga ini ang ahensya nga may pinakadako nga pondo.
Isa pa sa mga problema sang mga manunudlo ang nagadoble nga mga trabaho apang manubo ang sweldo nga nangin rason man nga pila sa mga education graduates ang ginapili nga magtrabaho sa luwas sang pungsod.
Suno kay Quetua ang iban nga mga professionals kaangay sang mga nurses kag mga Men in Uniform ang mataas na ang sweldo apang ang mga manunudlo nagapabilin sa gihapon nga manubo.
Samtang ginpahayag man sini nga ang Senior High ang magapabilin nga program apang ginbuhinan lamang ang mga subjects sang mga ini.
Panawagan ni Quetua nga mahatagan na sang dugang nga budget ang Department of Education kag mapataasan na ang sweldo sang mga manunudlo.
