Apisar sa bag-o nga school year kag bag-o nga Education Secretary, ang mga problema nga ginsugata sang pagbukas sang klase kahapon ang wala naman sang pagbag-o, sa baylo nadugangan pa.
Sa interview sang Bombo Radyo Bacolod kay Alliance of Concerned Teachers (ACT) Partylist Representative France Castro, kaangay gihapon ang mga problema nga nagsugata sa School Year 2024-2025 kag naglala pa bangod sa epekto sang Bagyo Carina sa Luzon.
Suno diri, pila sa mga eskwelahan ang napilitan nga magtunga sang isa ka classroom para sa duha ka klase kag ang iban nga buluthuan ang nagpatigayon na lamang sang blended learning bangod sa kakulang sang manunudlo.
Sa ila monitoring, ang mga manunudlo partikular na sa Grade 4 tubtob 10 ang may load nga pito tubtob walo ka klase sa sulod sang isa ka adlaw nga tuman ka makapoy.
Paathag sini nga kun basihan ang class size nga 35 students sa isa ka classroom, tuman gid kakulang sang mga manunudlo.
Dugang pa ni Castro nga responsibilidad pa sang mga manunudlo ang pagpadamo sang learning materials sa modular classes bangod kulang man ang ginprovide sang Department of Education (DepEd).
Pahayag sini nga apisar sa bag-o nga School Year kag bag-o nga DepEd Secretary nga si Sonny Angara, wala naman nagbag-o ang mga problema kag nadugangan pa.
Paathag ni Castro nga responsibilidad sang DepEd ang pagtsekyar sa sitwasyon sang mga buluthuan sa una nga adlaw sang klase, kag nangin tradisyon naman sang ACT ang monitoring sini.
Dugang pa ni Castro nga nagdugang pa sa palas-anon sang mga manunudlo sa Kinder, Grade 4 kag Grade 7 ang implementasyon sang Matatag Curriculum, nga proyekto ni anay DepEd Secretary kag Vice President Sara Duterte.
Sa iya paglantaw, indi pa nagakaigo ang tion sa pagpatuman sang programa bangod wala pa sang learning materials nga naplastar.
