Ginkumpirmar sang Department of Public Services nga padayon ang mga programa sang city government kag sang garbage hauler agud nga maengganyo ang mga pumuluyo nga magtipon sang basura kag ihaboy ini sang husto.
Sa interview sang Bombo Radyo kay Ramel Palalon, pinuno sang Department of Public Services, may trash to cash program kun sa diin ginabayluhan sang grocery goods ang mga recyclable nga basura.
Ini ang ginapatuman sa sulod na sang anom ka bulan.
May yara man sang clean it to win it kun sa diin isa ka raffle entry ang makuha sa isa ka kilo nga basura.
Agud nga makakuha sang raffle ticket, mamulot lang ang residente sang basura kag dal-on sa bin sa ila barangay agud nga ipakilo.
Ang premyo sa raffle amo ang lima ka kilo nga bugas.
Ang clean it to win it ang nagsugod sang natalupangdan ang paglapta sang basura sa mga kabarangayan.
Ini ang ginalakipan sang Barangay 13, Banago, Mansilingan, Vista Alegre, Bata, Punta Taytay, Barangay 35, Barangay 8, Barangay 2, kag Alijis.
Ini bangud sang naglibot ang DPS, ang napulo ka mga barangay ang may pinakamadamo nga basura nga nagalapta sa hilit-hilit.
Nagalibot naman ang IPM Construction and Development Corporation agud nga madugangan ang mga barangay nga butangan sang bin para sa clean it to win it.
