Naghuyhoy naman ang mga abaga sang mga jeepney drivers matapos nga liwat naman nga nagsaka ang presyo sang produktong petrolyo subong nga aga, Martes, Hunyo 28 santo sa gin-anunsyar sang mga kompanya sang langis.
Ini na ang ika-lima nga sunod-sunod nga semana nga may ara sang pagsaka sa presyo sang gatong.
Ang Shell kag Seaoil, ang nagpatuman sang P0.50 nga pagsaka sa presyo sang kada litro sang gasolina, P0.10 sa kada litro sang kerosene samtang P1.65 naman ang pagsaka sa presyo sang diesel.
Sa interview sang Bombo Radyo Bacolod kay Leonardo Montico, driver sang jeep nga nagabiyahe sang routa nga Bata-Libertad, indi na maayo para sa ila ang liwat nga pagsaka sa presyo sang gatong.
Suno kay Montico, indi man sila makapasaka sang pletehan bangud ang sweldo sang mga mamumugon ang wala man nagasaka kag madamo naman sang magreklamo sa tion nga sila ang magpasaka plete.
Suno diri sadto sang tag P50 pa lamang, ang gasto nila sa tughong sang gatong ang nagadangat lamang sang P900 apang sa karun nagadangat na sa P1400 tubtob P1500.
Ginpahayag man sini nga alas 05:00 sang aga nagaumpisa na siya sa pagbiyahe kag nagagarahe alas 07:00 ukon alas 08:00 ang takna sa gab-i apang ang mapauli lamang sini ang P150.00 hustuhan lamang ibakal sang 2 ka kilo nga bugas kag paswertehan kun may yara sang mabakal nga sud-an.
Dako ang pagpasalamat sini nga nagapanglaba ang asawa sini agud nga makabulig man kag makadugang sa ila nga kita.
Ginahingyo nalamang nila nga kuntani maghimo sang tikang ang gobyerno agud nga mapanubuan ang presyo sang gasolina agud man nga mabuhinan ang kabudlayan sang mga pumuluyo.
Aminado naman ang isa ka pasahero nagikan sa banwa sang Toboso, Negros Occidental nga nagmahal na ang pamasahe kasubong man ang nagapanguna nga balaklon.
Suno kay Jera Mae Dela Cruz, halin sa Toboso nagpamasahe ini sang P200 pakadto sa syudad sang Bacolod, apang kun magpasaka sang pamasahe madugang ang ila kabudlayan kag wala na sang mabilin sa ila nga sweldo.
