Nagalaom ang isa ka public utility jeepney (PUJ) driver sa Bacolod North Terminal nga makapatigayon sang training agud matudluan ang mga ini kun paano magproseso kag maggamit sang Land Transportation Management System (LTMS) portal sang Land Transportation Office (LTO).
Sa interview sang Bombo Radyo kay Arthur Severino, maayo para sa iya ang online renewal sang motor vehicle registration agud indi na maggasto pa sang dako kag makatipid sang oras.
Ang problema lamang suno sa iya amu nga kadamuan sa mga drivers ang indi pa makahibalo magproseso online.
Suno sa iya, kuntani makapatigayon sang training para sa mga ini agud sila ang matudluan kun paano makaparehistro online.
Pabor ini sa nasambit nga inisyatibo bangud imbes nga magkadto sila sa opisina sang LTO agud magproseso, kun online na lamang, ila pa magamit ang tion agud makabyahe.
Suno pa diri, mas makalikaw sa fixer kun online registration na lamang ang ipatuman. SAMTANG
Ginakabig sang chairman sang Sentrong Samahan ng mga Tsuper at Operators Negros (SSTONE) nga maayo nga inisyatibo ang paglunsyar sang Land Transportation Office (LTO) sang online renewal sang motor vehicle registration.
Sa interview sang Bombo Radyo kay Albert Villanueva, manami ini nga programa bangud madula na ang mga fixer apang madugangan naman ang ila nga gasto.
Suno kay Villanueva, convenient ini kun may ihibalo ang isa ka persona sa pagproseso online apang kun wala naman ihibalo ang isa ka persona sa paggamit sang portal, magabayad man ini gihapon kag magadugang lamang sa iya gasto.
Nagapati ini nga madamo nga ahensya ang magasunod man diri kag ipa-accredit lamang sa LTO agud makaproseso.
Mas manami naman para sa iya ang Motor Vehicle Inspection Center (MVIC) bangud wala na sang inspection kag manual ang proseso.
Suno sa iya, maayo kun butangan na lamang sang LTO personnel sa one stop shop agud indi na magginutok ang mga mapa-emission sa LTO office.
Apang maayo man para sa iya ang paggamit sang Land Transportation Management System (LTMS) portal para sa mga may ihibalo kag medyo mabudlay para sa mga indi anad diri.
Nagapati ini nga gintun-an man ini sang gobyerno antes gin-implementar kag nagalaom nga mangin madinalag-on ang ini nga programa.
