Nagaplano ang pila ka mga drivers sa syudad sang Bacolod nga temporaryo nga mag-untat sang biyahe sa tion nga magdangat na sa P100 ang kada litro sang krudo matapos nga asod-asod nga pagsaka sa presyo sang gatong subong nga tuig.
Sa interview sang Bombo Radyo Bacolod kay Reynaldo Baldon, residente sang syudad sang Talisay apang nagabiyahe sang Mandalagan-Libertad nga ruta sang jeep, tuman na kapiot ang pagbiyahe nila sa karun bangud tuman na kamahal ang presyo sang gatong.
Suno kay Baldon, sadto nagatughong lamang sila sang P300 kada adlaw apang sa karun P1500 na ang ila nga tughong.
Ginpahayag man sini nga sa kamahal sang presyo sang gatong kun panumdumon kulang na ang pamasahe sang tawo.
Suno diri kun magtuman na kamahal ang pamasahe, nagaplano nalang sila nga mag-untat sang biyahe kag magpangita nalang sang iban nga palangitan-an.
Suno diri mas maayo pa nga magubra sila, makakita pa sila sang P450 sa walo ka oras nga trabaho kumparar sa magbiyahe sang 16 oras nga wala sang kasiguruhan ang ila nga ginansya.
Samtang, ginpahayag naman ni Alon Sabid nga nagabiyahe man sang Mandalagan-Libertad nga ruta sang jeep, ginapaigo-igo nalamang sang mga ini ang ila nga maginansya sa isa ka adlaw.
Suno kay Sabid, nahangpan man siya sang iya mga kabataan nga insaktuhan nalang ipangbakal sang bugas ang ginansiya sini P300.
Ginpahayag man sini nga ang asawa sini ang nagapanglabada agud nga makabulig sa iya.
Nagapanghakot man ini sang balas sa tion nga magday off agud nga may pangpiyan-piyan.
Samtang wala pa man sila sang nabaton nga fuel subsidy.
Nagapanawagan man ini sa gobyerno nga mahimuan sang paagi nga mapanubuan ang presyo sang gasolina.
