Nakarekober ang Bacolod City Police Station 2 sang suspected shabu sa sulod sang awto kun sa diin ginpatay ang duha ka lalaki sa Purok Lampirong, Barangay 2, Bacolod City kagab-i.
Sa interview sang Bombo Radyo kay Police Capt. Paul Vincent Pendon, station commander sang Police Station 2, ginabanta nagabug-at sang isa ka gramo ang shabu, kag may narekober man nga drug paraphernalia, apat ka P1,000 bills nga lunsay peke, kag nanari-sari nga IDs, dokumento kag personal nga gamit.
Aminado ang hepe nga wala pa sang klaro ang motibo sa krimen bangud wala man sang witness.
May yara man sila sang ginpamangkutan nga lalaki nga nagapuyo malapit sa crime scene kag ginpahayag nga nakabati ini sang duha lang ka lupok bangud may deperensya ang iya pamatin-an, kag wala man ini sang nabatyagan nga salakyan nga gingamit bilang getaway vehicle.
Madugay man nga naggwa ang mga residente apisar nga nakabati sila sang paglupok bangud sa pagbubo sang mabaskog nga ulan.
Nagpasalamat ang hepe nga wala madalahig ang apat ka tuig nga bata nga nakita sang mga pumuluyo nga una nagresponde.
Wala pa naestablisyar kun sa diin ang igo sang mga biktima bangud wala pa makapasa sang report ang Scene of the Crime Operatives (SOCO).
Ginalantaw nga bala sang .9mm caliber pistol kag .45 caliber revolver ang narecover sa crime scene apang ginahulat pa ang ballistic report.
Negative man sa record sang Police Station 2 nga may ginlapas nga layi si Ursos ukon nag-intra sa iligal nga buluhaton.
Wala man ini nakita sa watchlist sang Police Station 2.
Istoryahon naman liwat ni Pendon ang iloy ni Mahipos agud mabuligan sila sa pagpa-autopsy sang bangkay sang biktima.
Gin-athag ni Pendon nga wala sang bayad ang pagpa-autopsy.
Suno diri, nagapangduha-duha ang iloy ni Mahipos nga ipa-autopsy ang bangkay sini bangud sa pagdumdom nga may bayad ini, samtang ang pamilya naman ni Ursos ang willing nga ipaidalom ang bangkay sini sa autopsy.
