BACOLOD CITY — Nadul-ong na sa ila tagsa ka balay ang mga miyembro sang Guihulngan City Police Station nga nagkalamatay matapos nga gin-ambush sang ginapatihan mga miyembro sang New People’s Army sa Barangay Magsaysay, Guihulngan City sang Biyernes sang aga.
Sa interview sang Bombo Radyo kay Guihulngan City Vice Mayor Ernesto Reyes, ginpahayag sini nga gindul-ong ang mga bangkay sang Domingo matapos ang necrological service nga ginhatag sa ila sa mismo police station.
Suno sa bise alkalde, tatlo sa mga pulis ang taga-Guihulngan City, isa ang taga-La Libertad, isa ang taga-Jimalalud samtang ang hepe nga si Police Supt. Arnel Arpon ang nadul-ong naman sa ila balay sa banwa sang Hinobaan.
Gilayon man nga magahatag sang burial assistance ang ciudad para sa mga himata sang nagtaliwan nga kapulisan.
Sa session sang Sangguniang Panlungsod sang Guihulngan bwas nga adlaw, paga-aprubahan man ang paghatag sang cash assistance sa pamilya sang mga nagkalamatay kag sang mga pilason.
Madumduman nga patay sa ambush sanday Arpon; SPO2 Necasio Tabilon; SPO2 Teovic Agosto; SPO1 Jesael Ancheta; PO2 Alvin Paul Bulandres; kag PO2 Alfredo Dunque; samtang, pilason naman sanday SPO4 Jerome Delara; PO3 Jordan Balderas; kag PO2 Joery Maribao.
Samtang, yara na sa maayo nga kahimtangan si Guihulngan City Councilor Paulo Edison Dela Rita matapos nga gin-ambush sang ginapatihan mga miyembro sang New People’s Army sa Barangay Magsaysay, Guihulngan City sang Biyernes sang aga.
Nahibaluan nga nagresponde ang mga miyembro sang Guihulngan City Police Station matapos nga gin-ambush si Dela Rita apang antes pa sila nakaabot sa ambush site, ginpaarakan sang luthang ang ila patrol car nga nagresulta sa kamatayon sang anom ka mga pulis.
Sa interview sang Bombo Radyo kay Guihulngan City Vice Mayor Ernesto Reyes, ginpahayag sini nga kibyas lang ang igo sang konsehal sa agtang kag ulo.
Magakadto kuntani ini sa iya uma sa Barangay Balogo ugaling gin-ambush sang mga suspetsado nga nagresulta sa kamatayon sang iya bodyguard nga si Michael Hambalos.
Kadungan sini, gin-abisuhan sang bise alkalde si Dela Rita nga mag-doble halong bangud ini na ang ikatatlo nga kahigayunan nga siya ang gin-ambush.
Suno kay Reyes, ginsulod sang una si Dela Rita sang armado nga lalaki sa ila balay apang wala naglupok ang armas, samtang gin-ambush man ini sa Barangay Balogo sang nagligad nga tuig apang nakasalbar.
Sa pihak nga bahin, wala sang pamahog sa kabuhi ang hepe nga si Police Supt. Arnel Arpon antes ang pag-ambush sa ila patrol car sa Barangay Magsaysay sang Biyernes sang aga nga nagresulta sa iya kamatayon kag lima ka iban pa nga mga pulis.
Suno kay Police Senior Supt. Henry Biñas, director sang Negros Oriental Police Provincial Office, bag-o pa lamang sa Guihulngan City Police Station si Arpon.
Malabo suno sa iya nga may manghingabot sa kabuhi ni Arpon bangud maayo kag mabuot ini nga sahi sang hepe.
Suno pa sa provincial director, transparent man nga sahi sang hepe si Arpon kun sa diin naka-account ang tanan nga pondo nga ginabaton sang ila police station amo gani nga tuman ang iya pagkanugon nga nadula ang tampad kag maayo magserbisyo nga sahi sang pulis.
Sa karun, nagabulig na ang Criminal Investigation and Detection Group sa NORPPO agud imbestigaran ang ambush apang indi pa mabuyagyag ni Biñas ang ila findings.
Gina-validate pa man ang impormasyon nga may utod si City Councilor Paulo Edison Dela Rita sa hanay sang New People’s Army nga amo ang isa sa ginalantaw nga mga rason sa pagtarget sang grupo sa konsehal.
