Sa tatlo ka semana nga pagserbe bilang acting Bacolod City Police Office (BCPO) director, ginhatagan sini sang 9 points nga ratings ang performance sang mga police personnel sa syudad.
Paathag ni P/Col. Noel Aliño, nga nagapanguna sini nga mandato amo ang pagpasanyog sang police visibility bangod ini ang nagapanguna nga nagapugong sa pagluntad sang krimen.
Suno diri, nakahibalo na ang kapulisan sa Philippine National Police (PNP) directives, policies kag guidelines, gani ang luyag naman sini nga matanom sa mga kapulisan amo ang disiplina kag concern kag indi nga husto lang nga magbatun sang sweldo.
Ginapakamaayo sini nga sa tatlo ka semana napabilin sini ang mga maayo nga programa sang anay BCPO director samtang may balon man ini nga mga panibag-o nga programa gikan sa ginhalin nga designation.
Paathag ni Aliño nga target sini nga maangkon ang crime-free society para sa syudad sang Bacolod.
Ginadumulian man sini ang pagtambay sang patrol cars sa estasyon kag ini ang yara sa gwa 24/7 magluwas lamang kun may gina-asikaso sa estasyon.
Paathag sini nga siya mismo ang nagalead by example kag mas masami nga yara sa gwa sangsa magtinir sa opisina.
Suno diri, sa nakaligad nga mga inadlaw, dako man ang ginubo sang pagluntad sang 8 focus crimes bangod sa pagsanyog sang police visibility.
Igapatuman man sini ang rewards and punishment kun sa diin nareview na sang acting BCPO director ang mga mapisan nga police personnel kag sa karun pagalantawon naman sini kun sin-o ang mga tamaran.
Siya ang nagpatigayon man sang command conference sang Domingo bangod luyag na sini bag-uhon ang nakaandan nga kaangay nga nagakadula man ang mga kapulisan kun Weekends.
Sa command conference mismo ang mga station commanders man ang ginapapatpat sini sang ila nga mga solusyon, plano kag progress.
