BACOLOD CITY – Nagpasalamat si Negros Oriental Governor Roel Degamo sa pagbisita ni Presidente Rodrigo Duterte sa probinsya kahapon agud bisitahon ang napatay kag pilason nga mga pulis sa ambush sadtong Hulyo 21.
Sa exclusive interview sang Bombo Radyo Bacolod kay Degamo, ginpahayag sini nga nagtaas ang morale sang tanan nga mga pulis sa Negros Oriental kasunod sang pagkadto ni Duterte sa nakahamyang nga mga miyembro sang Guihulngan City Police Station sa City Hall kag sa mga pilason sa Silliman University Medical Center sa Dumaguete City.
Naglawig suno sa iya tubtub las 12:30 sang kaagahon ang ila nga pag-istoryahanay sa conference room sang control tower sang Dumaguete-Sibulan Airport, kaupod sanday PNP Chief Director General Ronald ‘Bato’ Dela Rosa kag mga opisyal sang pulis kag militar sa Negros Island Region.
Kalakip sa mga gin-istoryahan ang pagpabakod sang security measures sa rehiyon kag assistance para sa mga pulis ilabi na sa mga nagkalamatay.
Nagpasalamat man ang gobernador sa mainit nga pag-abi-abi sang mga residente sang probinsya sa presidente nga ginalauman nga magabalik sa Negros Oriental sa bulan sang Oktubre matapos gin-imbitaran sa festival diri.
Las 12:30 kanina sang kaagahon, ginpatigayon ang send-off para kay Duterte nga naglupad padulong sa Davao City.
