Ginkalipay sang mga residente sang Barangay Singcang-Airport ang pagbutang nga isa sa mga festival sites ang Bacolod City Old Airport para sa Masskara Festival 2023.
Sa interview sang Bombo Radyo kay Rey Espina, nagatrabaho bilang isa ka pintor, kag residente sang nasambit nga barangay, maayo para sa ila nga mga residente sang barangay nga nalakip ang old airport sa festival sites sang Masskara festival bangod nga mas malapit na ini para sa ila.
Suno diri, indi na kinahanglan pa nga magbyahe sang malayo ang ila pamilya para sa Masskara.
Ginkalipay man sini nga ginbuksan na sa publiko ang old airport nga madugay naman nga wala ginagamit.
Aminado si Espina nga luyag sini nga kun tani magtayuyon nga mangin festival site ang Bacolod City Old Airport para sa maabot pa nga Masskara Festival. Samtang, padayon nga matawhay ang pagsaulog sang Masskara Festival sa ciudad sang Bacolod kun sa diin minor incidents lang ang nagluntad.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company (BCMFC) kag deputy city director for operations sang Bacolod City Police Office, may nagluntad nga kinawatay kag isa na diri amo ang sa Bacolod City Government Center kun sa diin gingisi gamit ang blade ang tarpaulin nga ginhimo nga tabon sa isa ka kiosko kag nakawat ang pila ka mga gamit nga gina-usar mag-tattoo.
Suno diri, sa imbestigasyon, mga menor de edad nga nagalagaw sa area ang suspek sa pagpangawat.
Kag suno sa biktima yara man sila sa sulod sang kiosko apang wala nila natulupangdan nga ginkuot ang ila gamit.
