Nagdamo ang nagapabakuna batok sa COVID humalin sang ginpahayag ni Presidente Rodrigo Duterte nga indi makagwa sa balay ang unvaccinated, dugangan pa sang no vaccine, no ride policy nga igapatuman na sa Metro Manila.
Kaina sang aga, nagbisita ang Bombo News Team sa Barangay Estefania nga nagapatigayon sang weekend vaccination kag indi magnubo isa ka libo ang mga pumuluyo nga nagpila sa barangay hall agud nga makapabakuna.
Sa interview sang Bombo Radyo kay Punong Barangay Jerry Tingson, naghingyo ini sa city government nga magpatigayon sang weekend vaccination bangud indi makapabakuna kun weekdays ang may yara sang trabaho.
Tinalikdan nga Sabado, indi magnubo sa duha ka libo ang nagpila sa barangay hall sang Estefania kag ginalauman nga amo man sini kadamo ang magapabakuna subong nga adlaw.
Suno kay Tingson, nagdamo ang nagpabakuna bangud may mga restrictions sa unvaccinated kag napahibalo naman sa mga pumuluyo ang ginpahayag ni Presidente Duterte nga indi makagwa sa balay ang wala nabakunahan.
Ang ciudad sang Bacolod ang may supply subong sang AstraZeneca, Sinovac, Pfizer, Moderna kag Janssen.
Sa karon, nabakunahan na ang masobra 70 porsyento sang mga pumuluyo sa Barangay Estefania.
Suno kay Ma. Elena Jayme nga nagapuyio sa Celine Homes, nagpabakuna ang iya pamilya agud safe sila sa sulod sang balay.
Subong nga adlaw, second dose na ang gintublok sa ila.
Suno naman sa 17-anyos nga si Peter John Yanong sang Purok Pag-asa, Barangay Estefania, napilitan ini nga magpabakuna agud nga maka-avail sang mga pribilehiyo nga para lamang sa mga vaccinated.
Sa pihak sini, nagpanugyan si Yanong sa mga wala pa nakapabakuna nga voluntary lamang ang vaccination
Aminado ang opisyal sang Emergency Operations Center sang ciudad sang Bacolod nga overwhelming ang suporta sang mga pumuluyo sa Barangay Estefania sa vaccination program sang gobyerno, ilabi na nga may vaccination gihapon kun Sabado.
Sa interview sang Bombo Radyo kay EOC deputy for medical Dr. Chris Sorongon, madamo ang nagpadulong sa barangay hall agud nga magpatublok sang first dose, second dose kag booster shots.
Sang nagligad nga Sabado suno kay Sorongon, 1700 ang nabakunahan sa Barangay Estefania kag mahimo nga matupungan man ini subong nga Sabado.
Suno sa EOC official, available ang tanan nga brand sang bakuna nga ginhatagan sang Food and Drug Administration sang emergency use authorization, magluwas lamang sa Sputnik Light.
Suno kay Sorongon, ang pagdamo sang luyag magpabakuna ang patimaan nga nagapamati ang mga pumuluyo sa panawagan sa mga city officials kag kay Presidente Rodrigo Duterte nga indi makasulod sa mga establisyimento kun indi fully vaccinated.
