Amat-amat na nga nakabalik sa tagsa ka mga panimalay ang mga evacuees nga naapektuhan sa paglupok sang Bulkan Kanlon.
Suno kay John De Asis, Municipal Disaster Risk Reduction and Management Office (MDRRMO), sang Hunyo 20, nakapauli na ang 179 ka pamilya ukon 561 ka mga indibidwal sa Brgy Sag-ang, banwa sang La Castellana kag kahapon, 190 ka mga pamilya ukon 689 ka mga indibidwal naman ang nakabalik na sa ila puluy-an sa Brgy Cabagnaan, sa nasambit nga banwa.
Sa karun, may yara pa sang nabilin nga kapin sa 1,000 ka mga indibidwal apang amat-amat naman nga naganubo ang numero sang mga evacuees sa evacuation centers.
Suno kay De Asis, ang ginpahanugotan nga makabalik sa ila tagsa ka mga panimalay ang mga nagapuyo lamang sa gwa sang 4km permanent danger zone.
Samtang, ang mga residente nga naga-istar sa sulod sang 4km permanent danger zone, ang ginpatinir sa gihapon sa evacuation centers samtang nagapabilin sa alert level 2 ang status sang bulkan.
Sa karun, padayon nga naganubo ang narekord nga tremors kag emission sang sulfur sang bulkan Kanlaon, apang padayon sa gihapon ang monitoring sa status kag sitwasyon sang bulkan.
