Igapanagtag na sa masunod nga semana ang ayuda para sa mga biktima sang sunog sa Purok Kagaykay, Barangay 2 kag Purok King Fisher A, Barangay 16, Bacolod City.
Suno kay Department of Social Services and Development (DSSD) Head Alma Gustilo, preparado na ang dokyumento sang mga makabaton sang ayuda nga P15,000 para sa may totally damaged nga balay, P10,000 para sa partially damaged kag P5,000 para sa sharers kag renters.
Suno diri, 111 tanan ka mga pamilya ang makabaton sang ayuda.
Samtang, may yara man sang igahatag nga assistance gikan kay Bacolod City Mayor Alfredo ‘Albee’ Benitez para sa pamilya sang purok president sang Purok King Fisher A, Barangay 16, nga nagtaliwan matapos nga makaangkon sang second degree burn.
Sa karun, amat-amat naman nga nagapatindog sang balay ang mga biktima sang sunog apang suno kay Gustilo igatsekyar pa kun private property ang duta ukon ini ang ginapanag-iyahan sang ciudad.
