Nakabaton na ang mga biktima sang sunog nga nagluntad sa Purok King Fisher A, Barangay 16, Bacolod City, kahapon sang kaagahon sang immediate relief nagikan sa Department of Social Welfare and Development kag city government sang Bacolod.
Sa interview sang Bombo Radyo Bacolod kay Alma Gustilo, pinuno sang Department of Social Services & Development (DSSD) sa ciudad sang Bacolod, nakabaton na ang mga biktima sang sunog nagikan sa ciudad kasubong man sa DSWD.
Suno kay Gustilo, ang purok president nga si Alejandro Tiad nga nakaangkon sang second degree burn ang makabaton man sang bulig.
Suno diri, ang mga evacuees ang mahimo sayluho sa gym sa likod sang Education and Training Center School 1 (ETCS-1) extension bangud may klase na kag ang ciudad ang magabutang lamang sang portalets nga mahimo maggamit sang mga ini.
Temporaryo naman nga nakatinir ang mga biktima sa ground floor sang nasambit nga eskwelahan bangud ang principal ang nagpahulam sang duha ka kwarto nga matiniran sang biktima sang sunog.
Gina-assess pa ang pagparelocate sang mga nabiktima sang sunog.
Nagapanawagan man si Gustilo sa tanan nga luyag magbulig sa mga nasunugan mahimo lamang ipadala sa talatapan sang DSSD sa ciudad sang Bacolod ukon iderekta sa Barangay 16 agud nga mahatag mga biktima sang sunog.
Nagdangat sa 25 ka pamilya ang biktima sang sunog sa nasambit nga lugar.
