Nagapanawagan ang pamunuan sang Bacolod Environment Natural Resources Office (BENRO) sa mga pumuluyo sang ciudad nga indi magbayad sang mga unauthorized garbage collectors agud nga maghaboy sang ila nga mga basura.
Sa interview sang Bombo Radyo Bacolod kay Ma. Fe Trespuentes, pinuno sang Bacolod Environment Natural Resources Office (BENRO), nagbalik na sa normal ang pagpangkuha sang Department of Public Services (DPS) Bacolod sang mga basura sa ciudad.
Suno kay Trespuentes, kun may mga backlogs bangud sa malain nga tiyempo, indi man nila ini malikawan apang ginatinguhaan nila ini nga makuha sa tion nga mag-ayo na ang tiyempo.
Suno diri, may mga tinion nga makita nga ang mga signages ang ginbutangan sang basura.
Suno kay Trespuentes ang ila nga suspek amo ang mga establishmento kag residential nga nagapasugot kag nagabayad sang mga tricycle or ebike nga maghakot sang basura ukon mga unauthorized garbage collectors.
Suno diri dapat wala ang mga pumuluyo nagapasugot nga hakuton ang ila mga basura sang mga ini bangud wala nagaderecho ang basura sa sanitary landfill kundi sa mga bakante nga lote.
Panawagan ni Trespuentes nga makig-angot sa opisina sang DPS ukon BENRO agud nga ma-arrange kag maschedule ang collection sang basura sa ila mga lugar.
Kaangay lamang sa bahin sang Barangay Felisa nga may schedule para sa ila garbage collection.
Ang mga pumuluyo ang mahimo makig-angot sa IPM-09773651828; DPS-09695944635 kag 09981618393 ukon sa landline 700-0302 para sa mga garbage concerns.
